Thahet Amazona! Arrin minimumin historik në 100 vitet e fundit, jeta e 481 mijë banorëve në rrezik

Të hënën më 16 tetor, në qendër të pyllit të madh brazilian, lumi Amazona arriti minimumin e tij historik në njëqind vitet e fundit, pas një thatësire të paprecedentë e cila po shkakton vështirësi të konsiderueshme për qindra mijëra banorë dhe po dëmton ekosistemin e xhunglës. 

Ulja e shpejtë e niveleve të ujit në lumenjtë që derdhen në Amazonën e fuqishme ka rezultuar në bllokimin e shumë anijeve, duke ndërprerë furnizimin me ushqim dhe ujë për fshatrat e largëta, sipas La Repubblica.

Për më tepër, temperaturat e larta të ujit dyshohet se kanë shkaktuar vdekjen e më shumë se 100 delfinëve të lumenjve të cilat janë specie të rrezikuara. 

Porti i Manaus, qyteti më i populluar në rajon, në bashkimin e Rio Negro dhe lumit Amazon, regjistroi një nivel uji prej vetëm 13.59 metra të hënën, krahasuar me 17.60 metra vitin e kaluar, siç raportohet në faqen e tyre zyrtare.

 Ky shënon nivelin më të ulët të regjistruar ndonjëherë, duke tejkaluar rekordin e mëparshëm të vendosur në vitin 2010.

Thatësira po prek 481,000 njerëz që nga e hëna, sipas deklaratave të agjencisë së mbrojtjes civile të shtetit të Amazonës, ku ndodhet qyteti i Manaus. Ministrja braziliane e Shëndetësisë, Nisia Trindade njoftoi se autoritetet po mobilizojnë burimet për të ofruar kujdes shëndetësor dhe mbështetje mjekësore në zonat e prekura.

Kujtojmë se lumi Amazon në Amerikën e Jugut është lumi më i madh për nga vëllimi i shkarkimit të ujit në botë, dhe sistemi lumor më i diskutueshëm më i gjatë në botë në krahasim me Nilin.